Vawiin khan Siamliana Hall, Mamit-ah Art & Culture Department leh All Institutions Mamit District buatsaihin Museum & Records Exhibition cum Book Sale neih a ni a, Pu Malsawmzuala, Project Director, DRDO, Mamit DC charge la mektu chuan Khual Lian niin hawnna hun a hmang.

Khual lian chuan kan kawtkaia kan hmuh mai theih loh thil hlui kan hmuh theih tura min chhawp chhuahsak tute chungah lawmthu sawiin, hnam ropui kan tih apiang te'n an hnam thil hlui, an thlahtute chanchinte an hlut thin a, zirlai kalkhawmte pawh en liam mai lova, chik taka a tum leh hlutnate hmu pha turin a chah. Pu Malsawmzuala chuan zirlaite chu lehkhachhiar uar a, mahni inrintawkna nena kan ram leh hnam chanchinte chiang taka hre turin a ngen bawk a ni.

He hun hi Dr. M.S. Dawngliana Hnamte chuan a kaihruaia, C.Lalmuanpuia, Chemist Art & Culture Department chuan Museum & Exhibition neih a nih dan a tarlang a, Mamit khawpui chhunga school hrang hrangte tan a inchhawka tlawhna hun siam niin naktuk hian chhunzawm a ni ang.

Museum Exhibition-ah hian Mizoram state Museum atangin Museum objects hrang hrang chi 80 phochhuah a ni a. Mizoram State Archives atangin rare books 14 leh Zoram humhalh tute sulhnu (freedom fighter from Mizoram) 24 nos display niin an chanchin tawn hrang hrang leh sapho laka kan ram leh hmeichhiate an hum na tarlan a ni. Tribal Research Institution atangin lehkhabu chi hrang hrang 49 man tlawm zawka hralh theihin chhawp chhuah a ni a, Mizoram Publication Board atangin lehkhabu hrang hrang 35 hralh chhuah theiha phochhuah a ni bawk.