Vawiin September 21, 2023 khan Art & Culture Department leh Mizo Academy of Letters (MAL) tawngkawpin an buatsaih ;Mizo Tawng Zir hona Seminar' chu Chanmari YMA Hall-ah neih a ni a. Pu R. Lalzirliana, Minister, Art & Culture Department chu khuallian a ni.

Mizo Tawng zirhona Seminar hawnna inkhawm hi Pi Carol VLMS Dawngkimi, Director, Art & Culture Department chuan a kaihruai a, Prof. R.L. Thanmawia, President, MAL chuan Keynote Address a sawi a. Khuallian Pu R. Lalzirliana chuan thusawiin, 'Art & Culture Department hotute leh Mizo Academy of Letters (MAL) lama hruaitute'n vawiin ang programme hlu tak buatsaih nachang hria a, mi thiam ko khawma Mizo Tawng zirhona tur hun remchang an siam chu lawmawm a ti a, a hlawkthlak hle a beisei thu a sawi sawi. MAL-in Mizo tawng humhalhna kawngah leh kan tawngin hma a sawn zel theih nana hma an lo lak tawhna-ah te lawmthu a hrilh a, hmalam an pan zelna turah tha thlah lova bei zel turin duhsakna a hlan. Tawng pawimawhzia sawiin, “Tawng kan tih chuan, kan ka atanga ri kan tihchhuah, thil awmzia sawifiah nan leh kan rilru puan chhuah nana kan hman piahlamah, thil reng reng a nihna lantirtu a ni a. Tawngin a sawifiah zawh loh chu mihring tu tan mah hriatthiam tak tak ngaihna a awmlo thin; chuvangin tawng hi thil engkim nihna petu leh awmzia hrilhfiahtu a ni,” a ti. Khuallian hian sawi chhunzawmin, 'Missionary hmasa te zarah A AW B (Mizo Script) kan nei thei chu kan tawng humhalhna kawngah a pawimawh hle tiin, “Tawng reng reng tipuitlingtu chu a ziak, Sap hovin a Script an tih hi a ni a, Tawng script neih loh chuan, eng ang tawng upa leh hman nasat pawh ni se, humhalh a har em em a ni. India ram chhungah ringawt pawh hian tawng hrang hrang, ziak nei lo, a hmangtu tlem tial tial, boral mai hmabak hi tam tak an awm a. Mizo tawng hi Latin Script atanga kaih-lek ni mahse, script puitling, alphabet hrang thlap nei kan ni a, hnam dang tam tak ai chuan kan vannei hle a ni tih hre thar leh theuh ang u,” tiin, Mizo Tawng hi kan tihchangtlun zel a, a hmangtute’n inang tlangin a hman dan tur dik taka hmang thei tura kan inzirtir a, kan inhrilhfiah a ngai a, Mizo Tawng tan hian theihtawp chhuah zel turin kalkawmte a chah a, Mizo Tawng zirhona Seminar hi a hawng nghal a ni.

Chawhma dar 11:00 AM - 12:30 PM inkarah hian 'Mizo tawng kalphung leh nihphung' tih thupui hmangin Pu Rozama Chawngthu paper present ngaihthlak a ni a. He zirhona-a Moderator Prof. Rualkhuma Colney, Vice President, MAL kaihhruainain zawhna leh sawihona hun hman zui a ni.

Hun hnihna hi chawhnu dar 1:00 PM - 2:30 PM inkarah neih niin 'Mizo tawng kauchheh leh ziak dan dik" tih thupui hmangin Dr. Darchuailova Renthlei, Asst. Secretary, MAL paper present ngaihthlak a ni a. Chawhnu huna Moderator Pu Lalchuailova, Deputy Director, Art & Culture Department kaihhruainain zawhna leh chhanna bakah sawihona hun hman a ni.

Chawhnu dar 2:30 PM atangin kharna inkhawm hman a ni a, Pu K. Lalruala, Deputy Director, Art & Culture Department chuan a kaihruai a. Seminar-a lo tel zawng zawng te hnenah Certificate hlan a ni a, he Seminar-ah hian Aizawl khawpui chhung zirna in hrang hranga MIzo Subject-a zirtirtute an tel a ni.