Vawiin August 18, 2023 chawhma dar 11:00 khan Tribal Research Institute, Art & Culture Department buatsaihin Chanmari YMA Hall-ah 'Mizo tual zal nun - hman leh tun' tih thupui hmangin Seminar neih a ni a, Pi Carol VLMS Dawngkimi, Director Art & Culture Department chu khuallian a ni.
He Seminar hi Pu F. Lalthanmawia, Senior Research Officer, Tribal Research Institute chuan a kaihruai a, khuallian Pi Carol VLMS Dawngkimi chuan thusawiin, 'kan pi leh pute nun dan tha leh mawi hriat leh chhawm nun hi hnam hmasawn zel kan nihna a kan tih tur a ni a, kan nihna dik tak kan hnam ziarang tha leh hlu te hi kan hmel pholangtu a nih avangin kan hre em em thin tur a ni', a ti.
Seminar-ah hian Prof. R.L. Thanmawia chuan 'Mizo tual zal nun - hmanlai' tih paper a present a; Prof. Malsawmliana chuan ' Mizo tual zal nun - tunlai' tih paper a present bawk a. Heng thupui pawimawh tak te zirhona leh sawihona hun hi Pu Lalrammawia Ngente, Associate Professor chuan a kaihruai a ni. He thupui zirhona-ah hian Govt. Mizo High School atangte, Govt. Aizawl College-a Post Graduate zirlai atang te, IMFA-a Dance & Music zirlaite bakah Mizo Academy of Letters atangin mi engemaw zat an tel bawk a ni.
