Ministry of Culture, Government of India buatsaih "Mera Maati Mera Desh" kharna Programme Kartavya Path (Raj Path tia sawi thin) chu New Delhi-ah October 30 & 31, 2023 hian neih tur a ni a. Hemi atan hian Art & Culture Department chuan Cultural Troupe pahnih - Cheraw kan tur leh Sarlamkai entir tur mi 15 ve ve Mizoram aiawh turin a tir. October 30, 2023 (Thawhtanni) chawhnu khan thiam takin Mizo hnam lam an entir a ni. 

Mizoram atanga Cultural Troupe pahnih te hian North East Zone Cultural Centre, Dimapur, Ministry of Culture, Govt. of India atanga sawmna dawngin October 24, 2023 khan Aizawl chhuahsanin Guwahati an pan a. Guwahati-a NEZCC hmunpui Shilpgram, Panjabari-ah thlengin India hmarchhak atanga tel tur state dang Cultural Troupe te nen ni hnih chhung, October 25 & 26, 2023 khan rehearsal an neih a, October 27 khan relin New Delhi an pan a ni. October 29, 2023 (Inrinni) khan final rehearsal tha taka an neih zawh hnuah October 30, 2023 chawhnu-ah hnam lam te hi an entir a, a hmunah Prime Minister Narendra Modi'an a telpui bawk.

Mizoram aiawha tel turte hi Aizawl Veng hrang hrang leh thingtlang khaw hrang hrang ami thlan khawm an ni a. November 1, 2023 (Nilai) zanah Mizoram panin New Delhi an rawn chhuahsan ang.