Vawiin 12th April, 2023 khan Mizoram University buatsaih VIRTHLI 2023 Cultural Day chu Mizoram University Auditorium-ah neih a ni a, 'Kut Nu' atan Prof. Lalbiakdiki Hnamte, Director, College Development Council niin, Kut Thlengtu chu 'Rajib Borah' a ni a, Virthli 2023 Cultural Day-ah hian Pi Carol. VLMS. Dawngkimi, Director, Art & Culture Department chu khuallian a ni. 

Khuallian Pi Carol VLMS Dawngkimi chuan thusawiin, 'hnam dangten Mizoram University (MZU)  an an tlawh thin avang leh hnam dang zirlai tam tak an awm ve avangin MZU a zirlai te hian kan mizo nunze mawi leh kan nihphung te, hnam incheina kan neih te hi uluk taka vawnhim a, mi dang hmuh tur leh entawn tura kan chhawp chhuah thiam a pawimawh a ni'm a ti a. Kan hnam kut themthiamna 'PUAN' kan neih te pawh hi uluk taka enkawl a, a nihna ang taka hmang tangkai thin turin Mizo zirlaite a fuih bawk. Khuallian chuan 'Cultural Day-a hnam hrang hrang lam entir pawh hi hnam in unauna leh inpawh leh zual nana hmang turin kal khawm te a sawm a ni.    

MZU Virthli Cultural Day-ah hian Mizo hnam lam Cheraw leh Chheihlam hmang a intihsiakna neih a ni a, group hrang hrang pakua (9) atangin intihsiakna an hmachhawn thei a ni. Intihsiakna a tel te hi MZU-a Department hrang hrang Student bakah Hrangbana College, T. Romana College leh Aizawl Govt. College atang te in an tel a, Mizo lam bakah hian Mizoram state pawn leh Mizoram chhung a hnam dang chengte atangin anmahni lam hmanga intihsiakna neih a ni bawk a, hnam dang lam hmanga intihsiakna hi hnam hrang 11 in an hmachhawn thei a ni. Intihsiak result chu hetiang hi a ni :

Mizo lam (Cheraw & Chheihlam)

1. Govt. Aizawl College

2. Govt. Hrangbanga College

3. Economics Dept. MZU

Hnam dang lam result :

1. Wangala - Meghalaya

2. Naga War Dance - Nagaland

3. Rangdhali - Assam