Vawiin March 20, 2025 (Ningani) khan Thangtea Hall, Champhai Kahrawt vengah Mizoram Upa Pawl District Headquarters, Champhai Assembly vawi 11-na leh District Silver Jubilee lawmna ( 2011 - 2025 ) ni pahfawmin Lengkhawm Zai intihsiak neih a ni a, Pu F. Lalthanmawia, Deputy Director, Art & Culture Department chuan Khuallian niin a hmanpui.

District MUP, President Pu K. Lalrintluanga’n inkhawm kaihruaiin palai inlawm leh inhmel hriattirna hun nei in, Rev. Vanlalruata, Kahrawt Bialtu pastor in hunserh a hmang. Khuallian Pu F Lalthanmawia, Deputy Director Art & Culture Dept. chuan thuchah sawiin, ‘Upate hi hriatrengna khawlna bawm, kan rohlu in ni e’, a ti a, ‘vawiina finna hi nimina upate min rochun a nih thu sawiin, upate uapna hian thalai leh ram mipui te thla a ti muang a, min zilhna hian hnam nun a siam tha thin’, a ti.

Pu Lalbiakmawia Khiangte, Vice President MUP Gen, Hqr chuan Jubilee a rawn hmanpui a, Jubilee Souvenir Book a tlangzarh, thusawina hun neiin kum lama upa te hamthatna, hriselna kawngah te, zin veivahna senso chungchanga hamthatna an nei theih hrang hrang te  kalkhawmte hnenah a sawi a, MUP Gen, Hqr. hmalakna hrang hrang leh hmachhawp hrang hrang a sawi bawk.

MUP District Hqr. Champhai-ah hian Area 11 awmin Branch 65 an awm a, member zawngzawng hi 7096 an ni. Silver Jubilee lawmna pakhat Lengkhawm zai intihsiak neih niin Area tinah an intihsiak phawt hnu-in pakhatna te theuh in final intihsiakna an nei leh a, Final-ah hian Branch paruk (6) te an in el leh a ni.  Lengkhawmzai intihsiak hi Pu C Roliana Vice President MUP Champhai Hqr in a kaihruai , Pu F. Lalthanmawia, Pu B. Bawlkhuma Tlangnuam leh Pu C. Vanlalsiama Saron veng ten intihsiak an endik a, hetiang hi result a ni -

 Pakhatna - Champhai Zion Branch

Pahnihna - Lianpui Branch

Pathumna - Champhai, Zotlang Branch