Mizoram State Museum, Art & Culture Department buatsaih Museum Week chu February 19 - 23, 2018 khan hman a ni a. Museum Week chhung hian nitin chawhma dar 10:00 atanga tlai dar 4:00 thleng mipui tan Museum chu en man awm lovin thin a ni. Tin, Museum Week hmang tur hian Zirna In (Institution) 6 (pasarih) heng - History & Ethnography Department - MZU, ICFAI University, RIPANS, IASE, History Department - T. Romana College leh DIET-Aizawl te sawm an ni a, School Education Department, Higher & Technical Education Department leh Aizawl North Treasury Office Staff-te an sawm bakah TNT-Zuangtui-a naupangte an sawm bawk a, Museum Week chhung hian tlawhtu mi 5468 an nei a ni.

Museum Week hi kum 2004 atang khan kumtin February thla chawlhkar tawp berah hman chhoh thin a ni a. Museum chi hrang hrang awm zingah Mizoram State Museum hi Multipurpose Museum a nih avangin a hlutna hi a sang bik a, tlawh a man hla em em a ni. Mizoram State Museum hian 2016-2017 sawrkar kum chhung khan tlawhtu mi 10,147 an nei a, museum en man atangin sawrkarah Rs. 64,000 /- an chhunglut a. Sawrkar kum kan hman mek April 2017 atanga vawiin ni thleng hian tlawhtu mi 3068 an nei tawh a, sawrkarah Rs. 38,480 /- an chhunglut tawh a, kum kal mekah hian museum tlawh tu zinga mi 19 te hi Foreigner an ni a, mi 51 te hi mizoram pawn atangin an ni. Tin, VIP leh VVIP Visitors engemaw zat an nei bawk a ni.

Mizoram State Museum-ah hian Gallery 6 (paruk) a awm a, Mizoram State Museum hian Museum objects 3757 lai a la khawm tawh a, heng zinga 933 te hi show case chi hrang hrang 107-ah pho chhuah a ni a. A bak zawng hi reserve collection-ah dah a ni. Tribal Museum, Ranchi-ah te, Bhopal Museum-ah te, Silpigram Museum, Guwahati-ah te Museum Objects hi eng emaw zat thawn (Donate) an ni tawh bawk.

Ni bika a thlawna Museum entheih ni tih lohah chuan Museum tlawhtu an tam lem lo va. Ni bik, a thlawna Museum en theih hunah entu an tam em em thin a. Chung ni te chu ‘Museum Week’ leh ‘International Museum Day’ te an ni. Entry fee hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia educational trip-a lo kalte chu 50 % concession pek an ni a. Tin, kum upa, kum 65 chin chung lam te chu en man chawitir an ni lo bawk. Tin, ram pawn atanga lo kal foreign visitor-te en man atan Rs. 50 /- lak a ni bawk. Museum-a camera (still leh Video) ken luh man hi siam thar a ni a, hetiang-in Mobile Camera & Ordinary Camera - Rs. 20 ; Digital & Movies Camera - Rs. 100; Video Camera - Rs. 250; Documentary Film - Rs. 1000 /-. Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 3:30 PM-ah hawn a ni thung. Tin, chawlhkar tin thawhtan ni apiang hian chawhma lamah thawktuten Gallery tihfaina hun an hmang thin a, chuvangin thawhtanni-ah chuan Dar 1:00 PM -ah Museum hi hawn thin a ni a. Tin, Inrinni hian dar 10:00 AM - 2:00 PM chhung Museum hawn thin a ni a. Sunday leh Sawrkar Holiday-ah te chuan Museum khar thin a ni.