Vawiin ni 28 November, 2022 chawhma dar 10:30 khan Mizoram State Museum, Art & Culture Department chuan Museum Week an hmang tan a, December 2, 2022 (Friday) thleng a awh dawn a, Museum Week chhung hian mipui tan en man awm lovin Museum an hawng dawn a ni.

Museum Week hawnna inkhawm hi Pi P.C. Zosangpuii, Museum Curator-in a kaihruai a, Pu R. Hmingthanzuala, Director, Art & Culture Department chu khuallian niin Museum Week hi a hawng a ni. Khuallian hian thusawiin, "Museum hi hnam rohlu kan neih te zing a mi a ni a, Museum hian kan nihna min hmuhfiah tir thin a, khawvel hmasawnna thang mekah hian kan nihna dik tak hmufiah turin hnunglam kan hawi let a tul fo va, Mizo mipuiten Museum kan ngaihlu mek zel hi a lawmawm a, hmasawn tura ke kan pen rual hian kan nihna hmufiah turin Museum hi i ngaihlu zel ang u," a ti. Museum Week hawnna inkhawm hi Modern HSS, Aizawl zirtirtu leh zirlai ten an hmanpui a ni. Mizoram State Museum bakah District Art & Culture Department Museum, Lunglei-ah Museum Week hi hman ve nghal a ni bawk. Tin, Museum Week hawnna inkhawmah hian Constitution Day hman nghal niin Preamble chhiar rualin hun hman nghal a ni.

Museum Week hman mekah hian District Education Office, Aizawl te nen tang dunin Aizawl khawpui chhunga school thlan chhuah bik 10 ten Museum an tlawh hun tur ruahman a ni bawk. State Museum-ah hian Objects 3911 neiin chung zinga 723 chu Showcase 100-ah an phochhuak mek a; kumin January atanga November thlengin Museum tlawhtu mi 8563 an awm tawh a, heng zing a mi 72 hi ram pawn lam tangalo kal an ni a, VIP 6 in an tlawh bawk.