Mizoram State Museum, Art & Culture Department buatsaih Museum Week chu September 8^th – 12^th , 2025 khan hman a ni a. Museum Week chhung hian nitin chawhma dar 10:00 atanga  tlai dar 5:00  thleng mipui tan Museum chu en man awm lovin hawn thin a ni. Tin, Museum Week hmang tur hian zirna In (Institution)  hrang hrang, a pawl hniamber atanga University scholar thlengin tlawhtu kan nei tha leh hle mai a , a lawmawm tak zet a ni.  Museum Week chhung hian tlawhtu mi  3517  school, college leh institution hrang hrang atangin kan nei a ni.

Museum Week hi kum 2004 atang khan kumtin February thla chawlhkar tawp berah hman chhoh thin a ni a, amaherawhchu school chawlh hun leh naupang exam hun te an danglam  deuh  hnu  hian sikul naupang leh college naupang tlem a hunthawl an neih theih deuh hun a zir  zelin  Museum  week pawh her danglam a ni ta ni.   Museum chi hrang hrang awm zingah Mizoram State Museum hi Multipurpose Museum a nih avangin a hlutna hi a sang bik a, tlawh a man hla hle a ni. Mizoram State Museum hian 2024-2025 sawrkar kum chhung khan tlawhtu mi 12,490 kan nei a, museum en man atangin sawrkarah Rs. 1,21,920 /- kan chhunglut thei a ni. 

Mizoram State Musuem ah hian Gallery paruk (6) showcase za (100) Museum Object display 732 bakah reserve collection ah object 4347 dah that a ni a , a za vaiin object  5079 vawn that mek a ni.  Museum Curator hovin thawktu mi pariat (8) an awm mek a ni. 

Mizoram State Museum, Art & Culture Department hian Internship programme a lo kalpui tawh thin a, college/university zirlai te leh scholar ten an hlawk puiin an zirlai atan an lo tangkaipui tawh thin hle. Internship an tih hun chhung hi an college/university ten an rawn duan sak ang zelin Museum ah hun an rawn hmang mai thin a , Museum internship programme hi stipend awm lo a ni a admission fee pawh a awm lo a ni.  Internship an tih chhung hian museum objects dim dawi taka enkawl dan te , accession register vawn dan te, object catalog dan te, computerized leh manual a museum entry ticket pekchhuah dan te, object lakkhawm (collection of objects) dan te , museum guide hna te leh establishment office kalhmang te an zirchiang tlangpui thin. Kum kal mekah Mizoram chhung leh pawn atangin zirlai  14 in tha takin internship programme an rawn nei tawh a ni.