Vawiin April 28. 2022 khan Art & Culture Department bul tumin Muthi Model Village-ah Art & Culture Public Relation and Outreach programme hman a ni a. Pu Carol VLMS Dawngkimi, Director Art & Culture Department chu khuallian a ni.
Muthi khua hi sawrkar laipui ruahmanna - Sansad Adarsh Gram Yojana(SAGY) hnuaiah Mizoram M.P(Lok Sabha) Pu C.Lalrosanga’n Model Village-ah a lo puang tawh a. Model Village te hi sawrkar laipuia Ministry of Rural Development and Panchayati Raj hmalakna pakhat, Sansad Adarh Gram Yojana (SAGY) hnuaia thlan niin he hmalaknaah hian Model village te hi kum 5 chhung atan kawng hrang hranga tih hmasawnna tura ruahmanna a ni. Heng Model Village atana thlan chhuah te hi Central Sawrkar leh State Sawrkar Department hrang hrang te hmalakna in hmasawnna hrang hrang thawh tura ruahman a ni a, chung zinga hnam ziarang Culture chhawm nun kawnga hmalakna hmangin Art & Culture Public Relations and Outreach Programme hi buatsaih a ni.
Muthi Community hall-a neih Art & Culture Public Relations and Outreach Programme hawnna inkhawm hi Pu Laltanpuia,Chairman, Model Village Development Committee & Vice President, Muthi Village Council chuan a kaihruai a, Pu Lalchuailova, Deputy Director Art & Culture Department & Nodal Officer SAGY chuan report a pe a, Pu Kaphmingthanga Zote, President, Village Council, Muthi chuan thusawina hun a hmang a, Pi P.C. Zosangpuii, Museum Curator chuan lawmthu sawina hun a hmang a, Pi K.C Runremsangi , Padma Shri chuan zaiin mipui a awi a ni.
Khuallian Pi Carol VLMS Dawngkimi chuan thusawiin SAGY kaltlanga sawrkar laipui hmalakna ah hian ‘hmasawnna chu thingtlang khua atangin a intan tur a ni,’ tih a nih angin Model village ah ngei vawiina programme hman a ni chu a inhmehin lawmawm a tih thu a sawi. MIzo hnam ziarang leh rohlu-te humhalh a, chawinung a, hmasawnpui theih turin he programme hi kan rawn hmang a ni a ti.
Vawiinah hian Model Village Muthi khua pualin Tribal Research Institute(TRI) leh Mizoram Publication Board ten Mizote tana lehkhabu rotling tak tak te a duh apiang tana lei theihin an pho chhuak a. Mizoram State Museum leh Mizoram State Archive ten Museum & Archive item/objects chi hrang hrang pho chhuakin Exhibition an nei bawk a ni.
Chawhnu hun hi Muthi Field-ah Outreach Programme hmanga chhunzawm a ni a, Pi Jenifer Vanlalhruaii Pachuau, BDO, Tlangnuam Block chuan he hun hi a kaihruai a, Pu Lalchuailova, Dy Director, Art & Culture Department chuan thusawina hun a hmang a, Pu F. Lalthanmawia, SRO, TRI, Art & Culture Department chuan lawmthu sawina hun a hmang a ni. Outreach Programmre Host - Pu MS Ralte hruainain Muthi khua-a NGO hrang hrangten Mizo hnamlam leh zai an entir a, Art & Culture Department atangin Pi K.C. Runremsangi, Padma Shri leh Pu Lallawmpuia Fanai, Music Instructor-ten zaiin mipui an awi bawk a ni.
