Art & Culture Department Annual Working Programme duan lawk angin vawiin November ni 1, 2024 hian Cultural Meet, Neihloh Y.M.A. leh a khaw chhehvel Y.M.A. Branch hrang hrang te nen Neihloh Mual zawl nuam takah hman a ni. Pu Lalchuailova, Deputy Director, Art & Culture Department chuan Khuallian niin a hmanpui. 

Neihloh khuaa Cultural Meet Prohramme hi Pu Hranghmingthanga, President, Neihloh YMA chuan a kaihruai a, Pu R. Lalrinliana Asst. Secy, Neihloh Branch YMA in report pe in Pu PC Rothianga, MUP President, neihloh khua in hunserh a hmang a. Pu Lalawmpuia, VCP, Neihloh khua in thu tawi a sawi a, Pu Lalrempuia Youth Icon - 2012 in zaiin mipuite a awi bawk a ni.

Khuallian Pu Lalchuailova chuan thusawiin, kan Kristianna leh hnamzia hi inmil leh inhne rem zawnga tan lak zel a tul thu a sawi a. Khawvel hian hmasawn zawngin ke penin, chak viau mahse, Mizote Kristian te chuan hnam nunphung, hnamzia leh Kristianna thansan zawnga hmasawnna kawng zawh hi thil inhmeh lo tak a ni a ti a. Hmasawnna hi kan Kristianna leh hnamzia hnuchhawn zawngin kan kal pui thianglo , hnam dang zia zir lova, Siamtu Pathian, Mizo-a min siamtu-in hnamzia atana min pek mil hian i Kristian ang u, a ti. Pathian thu pawh hi hnamze milin sawi ila, kan hmuh leh hriat, kan chin than mila sawi chuan kan hrefiah bik thin a ti bawk.

 Cultural Meet-ah hian Neihloh Branch YMA, Buangpui Branch YMA, Kanghmun South Branch YMA, Thenzawl Branch YMA I, MCO – Thenzawl, Serchhip Cultural Troupe Sub Hqrs., MUP Neihloh Branch, Neihloh Branch YMA Chhang leh Govt. primary School – Neihloh te Mizo hnam lam ;eh zai chi hrang hrang an entir a. Khuallian Pu Lalchuailova’n Cultural Meet-a tel te hnenah lawman a sem a, Tv. Lalbiaknunga, Neihloh Branch YMA Secy in lawmthu sawina hun a hmang a ni.