December 5, 2025 (Zirtawpni) hian Art & Culture Department leh Serlui Group YMA te tangkawp buatsaihin Noxatilla-ah Cultural Meet neih a ni a. Pu F. Lalthanmawia, Joint Director, Art & Culture Department chuan Khuallian niin a hman pui a; he Cultural Meet-ah hian Serlui Group YMA  huam chhunga YMA Branch hrang hrang te an tel a ni.

Noxatilla-a Cultural Meet hi Pu L. Hmangaihzuala, Vice President, Serlui Group YMA chuan a kaihruai a; Nl Jemima Lalmalsawmi, Noxatilla chuan hunserh a hmang a, Pu Aldrin Ralhrangluaia, President, Serlui Group YMA chuan thu a sawi a, Pu R. Lalnunmawia, Asst. Secretary, Serlui Group YMA chuan lawmthu sawiin hun a hmang bawk.

Khuallian Pu F. Lalthanmawia chuan thu sawiin 'Zofate hmun hrang hrangah awmin, inrelbawlna ramri in min kar dan mahse insuikhawmna rilru pu chunga thinlunga inpumkhat zel tur leh Mizo nun zemawi vawnhim kawnga tan la zel turin kalkhawm te a fuih a'.  Kan awmna hmun zir zela midangte nena thawhhona tha nei thei tur te, hnam phatsan zawnga hma la lo tur leh kan rin Pathian tana rinawma a ram ti zau zel turin a chah bawk a ni.

Cultural Meet-ah hian heng YMA Branch - N.Chawnpui, Bilkhawthlir atangin - Kawn Veng, Dawr Veng, Kualmawi, Kanan, Hmar Veng; Vairengte atangin - Kawngthar,  Hmar Veng,  Zalen Veng,  IOC, Field Veng te; Buhchangphai, Phainuam, Dholchera leh Noxatilla te an tel a, Mizo hnam lam chi hrang hrang entirin  zai mawi tak tak ngaihthlak a ni bawk. Serlui Group YMA huam chhungah hian YMA Branch 31 an awm a, YMA member hi 9800 bawr vel an awm bawk.

Cultural Meet hi a hlawhtling hle a, Serlui Group YMA huam chhunga Zofate leh a chhimtu hnam dang ten an hlut hle.