Ni 4.8.2022 khan Art and Culture Department buatsaih Mizoram pum huap Pi Pu Zai Intihsiak 2022 kharna leh lawmman semna hun, Aizawl Vanapa Hall a neih a ni a, Art and Culture Minister Pu R.Lalzirliana’n khuallian niin a hmanpui. Khuallian Pu R.Lalzirliana chuan khawvela hnam dingchhuak te reng reng chu an hnam nunphung vawnghim tlat tute an ni zel a, mahni hnamzia chawinun nachang hre lo chu hnam bo leh hnam ral, an vela hnam dangte chimral leh lem zawh an ni mai thin, a ti a. Mizo anga khawvel hriata kan inphochhuahna atana pawimawh ber zinga pakhat chu - tu hnam tihdan mah kan zir leh entawn loh pi pu zai hi a ni a, rimawi lama kan changkan chhoh zelna tur atana kan hmabak chu he kan pi pu zai ‘folk song’ chawisan a chawinun chhoh zel hi a ni, a ti bawk.
July, 2022 chhung khan Art & Culture Department chuan kum 14 chin chunglam tel theihna Pi Pu Zai Intihsiak 2022 hi a buatsaih a. He intihsiakah hian mi 31 an tel a. Audition hi video clip-a thehluh niin endiktuten an zing atangin a titha zual Top Ten (mi 12) an thlang chhuak a. Heng mi 12 te hian Vanapa Hall-ah intihsiakna an neih chhunzawm a, hetiang hi result a ni -
1. C.Lalbiaknii, Ainawn Veng Rs. 30,000 + trophy + certificate
2. Ngurthansanga, Khawruhlian Rs. 20,000 + trophy + certificate
3. Lalrinmawia Chawngthu, Durtlang Rs. 10,000 + trophy + certificate
Mi pakaw dangte hnenah hian Consolation Prize cheng 5000 leh certificate hlan a ni bawk.
Art & Culture Director Pu R.Hmingthanzuala chuan Kharna inkhawm hi a kaihruai a, State Level Pi Pu Zai Intihsiak Committee Chairman Pu Lalchuailova, Art & Culture Deputy Director chuan report a pe a. Pu F.Lalthanmawia, Senior Reasearch Officer, Art & Culture Department chuan lawmthu sawina hun a hmang a ni.
1na C. Lalbiaknii
2na Ngurthansanga
3na Lalrinmawia Chawngthu
