Ni 30.03.2026(Thawhtanni) tlai khan Lamka Branch YMA, Manipur hruaitute chuan Mizo Comics bu lar, Sudden Muanga ziaktu Pu Lalsangzuala bungraw hlui leh thawmhnaw, Sudden Muanga comics a ziah thinna hmanrua te, Sudden Muanga bu hlui engemaw zat te chu Central YMA kaltlangin Mizoram State Museum a phochhuah turin an hlan. Vawiin dt.8.5.2026 (zirtawpni) hian Pu C Lalruatfela, Curator Mizoram State Museum hnenah CYMA President, Pu R.Lalnghetan a hlan .
Pu Lalsangzual Varte (1951-2016 ) hi Thakthing-ah 13th Jan, 1951 khan Lalnghinglova Varte leh Lalhluni Sailo te karah a lo piang a. Lehkha thiam thei tak a niin, Don Bosco leh Sielmat-ah te sikul a kai a. Pawl 9 leh pawl 10 hi a rualin a zir a, ṭha takin matric a zo. BA bik hi Churachandpur College-ah zirin honours a la lo a. Distinction-ah pass-in Manipur pumah pakhatna a nih thu a thianpa chuan a sawi. Tin, MA hi Jawahar Lal Nehru (Imphal branch)-ah tha takin a zo leh a ni. 1970 khan Lamka College-ah lecturer (tunah chuan Asst. Professor an ti tawh) hna thawkin Mizo subject a zirtir a. A thih ni thlengin a thawk. A hun tawp lamah hian Associate Professor-ah a kai sangin Mizo department-ah HOD niin a pension .
Sudden Muanga bu hi copy tlem tein bul a ṭan a, Kolasib lama awm, a nu a thawn ṭhin niin an sawi. A lar chhoh hnu deuhah Mizoram lama lehkhabu dawr tam takin zawrh turin an rawn dil chho tan ta a, hun a kal zel a,copy 4000 a kai chho ta thuai a. Pu Saizawna, khatih laia a her-tupa ber chuan copy 6000 vel chu an hera a hriat thu a sawi. Zalen chanchinbu lama kan hmuh dan chuan copy 8000 a han hawlh thung. Kum 2000, december thla kha Sudden Muanga series hnuhnung ber chu Joseph L. Ralte (Zorin compugraphics) -in a chhuahsak a, copy 10000 (singkhat) lai an ti chhuak a ni.
Sudden Muanga comics hi Volume 23 zet siam a ni a. Kum 1977-a an ṭan kha kum 2002 khan Sudden Muanga Offside 2 hmangin a series hi a tawp. Kum 25 zet chu zofate min awi tlei kan ti thei ang. A ziaktu Pu Lalsangzuala hi June ni 14, 2016 khan a thi a. A ruang hi lumen niin a tuk, YMA day-ah tak vui liam a ni.
 |  |  |  |  |
 |  |  |  |
