Ni 26 August, 2022 zan dar 5:30 - 6:30 inkar khan DDK Aizawl Station chuan Friday Live discussion hunah "Record Vawn that leh Mizoram Sawrkar dinhmun", tih thupui hmangin program a buatsaih a. He hunah hian Pu F.Lalthanmawia, S.R.O, Tribal Research Institute, Pu Lalmuanpuia, Archivist, Mizoram State Archives leh Eva Lalrampari, Anchor ten hun an hmang a ni.
He program-ah Mizoram sawrkar record-te dahthatna tura Sawrkarin a siam Mizoram State Archives-ah record series gap thui tak a kim tawh loh thu leh a pawizia te uar takin sawi ho a ni a. Mizoram sawrkar hnuaia Department hrang hrangte chu record vawn that kawngah an inthlahdah thu leh tan lak a ngaih tawh thu uar takin an sawi. Tin, State Archives in an record kawl mek, a hlutna chhut chhuah rual loh te chu digitize hna an kal pui mek thu te sawiin an sum neih a tlem tham deuh avangin hna thawh zawh theih a ni ta lo va, thawh chhunzawm ngei ngei ngai a nih si avangin a remchang hmasaah sawrkarin hna thawhzuina tur sum hi ngaihtuah sak thei se an duh tak zet thu an sawi bawk.
Mizoram sawrkar mai nilo, NGO's emaw Pawl dang emaw mimal te pawhin Archives-ah hian record dahluh theih a nih thu an sawi bawk a. Amaherawhchu heng record Archives-a dahluh turte erawh chuan Mizo mipuite emaw Mizo hnam tan, Mizoram tan hlutna an neih erawh a ngaih thu an tarlang bawk a ni.
