India zalenna kum 75 na champha lawmna, Azadi Ka Amrit Mahotsav kal zelah Ministry of Culture, Govt. of India chuan Har Ghar Tiranga ( In tina Hnam Puanzar Zar) Campaign chu India ram pumpuiah Ni 13 - 15 August, 2022 chhung atan a buatsaih a nih kha. Mizoram Sorkar pawh Sorkar laipui thupek bawhzuiin Har Ghar Tiranga Campaign hi hlawhtling takin a huaihawt a ni. He Campaign-ah hian Art & Culture Department, Govt. of Mizoram pawh Nodal Department a nih angin May, 2022-a hriattirna a hmuh atangin hmalak tan a ni a. Secretary, Art & Culture Department, Govt. of Mizoram kaihhruaina hnuaiah Organising Committee din niin June ni 3, 2022 ah meeting hmasaber neih a ni a, he meetingah hian Sorkar hnuaia Department hrang hrang te mawhphurhna pek an ni.
Art & Culture Department hian India hnam puanzar hi Kolkata a Firm pakhat M/S SAKSHAM atangin flag 2,00,000 order a ni a. Chung Flag te chu Mizoram chhung District (District - 11) zawng zawngah hetiang hian sem chhuah vek a ni -
1) Serchhip District - 8,000,
2) Hnahthial District - 6,000,
3) Lunglei District - 29,000
4) Lawngtlai District - 11,000
5) Siaha District - 11,700
6) Saitual District - 12,000
7) Khawzawl District - 7,000
8) Champhai District - 20,000
9) Mamit District - 8,000
10) Kolasib District - 10,600
11) Aizawl District - 76,700
Mizoram a Har Ghar Tiranga Campaign huaihawt nan hian District tina Deputy Commissioner Office te chu mawhphurhna pek an ni a, D.C. tinah hian District Level Coordination Committee din niin he Committee hian an District tinah he campaign hi a hlawhtlin theih nan nasa takin hma an la theuh a ni.
District tinah hian Retailer/ Fair Price Shop (Ration lakna) chu hnam puanzar zuar tura tih an ni a, Flag hi Rs. 20/- zela hralh a ni. Hemi bakah hian Aizawl khawpuiah chuan Art & Culture Department in flag zawrhna hmun hrang hrang a siam bawk a. Tin, AMC hnuaia Local council ten an huam chhunga an zawrh turih flag engemaw zat chu AMC ah dah a ni bawk. Flag bakah hian Banner/Poster te hmun hrang hrangah zar a ni a. In tina flag zar anih theih nan hian publicity campaign, social media hrang hrangah kalpui ani a, tin veng tinah Information Centre atangin In tina zar vek turin mipuite ngen an ni bawk.
He Har Ghar Tiranga hi Mizoram-ah chuan tha tak a zawm a ni a, In, Dawr, School leh Sorkar Office hrang hrangah te Flag zar a ni a, Zirna in leh hmun hrang hrangah Har Ghar Tiranga kawng zawh te pawh huaihawt a ni bawk.
Sorkar laipuiin In tina hnam puanzar zar tura an remruatna hi India mipui hian hrethiamin State hrang hrangah pawh programme hi a hlawhtling hle a. India rama mi chi hrang hrang leh hnam chi hrang hrang chin dan leh ei leh in inanglo tak tak te pawh Hnam puanzar pakhat hnuaiah inlungrual leh hlim tlang takin kan cheng ho a. India zalenna Kutpui 75 - na lawmna ah hian chu chu Mizoram mipui pawh hian chezia leh thiltihin a lantir a ni. He Campaign in a tum India Hnam Puanzar ngaihhlutna leh hnam inpumkhatna chu India mipuite ah a tuh thar hle a ni.
