Nimin Ocotber 5, 2022 (Nilaini) khan Keifang Centenary Sport Complex-ah Art & Culture Department leh Saitual Sub Hqrs. YMA - te tangkawpin a buatsaih Cultural Meet neih a ni a. Pu Lalrinenga Sailo, AMC Mayor chuan Khuallian niin a hmanpui a, Pu R. Hmingthanzuala, Director, Art & Culture Department chu Khualzahawm a ni. Khuallian hian thusawiin, "hnam hmangaih mi chuan hnam zia a thlak ngai lo", a ti a, "Hnam tam tak ziarang boral tawhte an tho chhuak leh mek a, mahni hnam ziarang vawn nun leh ngaihhlut hi kan tih tur ani," a ti.

Pu C. Lalkima, President, Saitual Sub Hqrs. YMA chuan  Cultural Meet hawnna programme hi a kaihruai a; Pu C. Lalremruata, SEC-in hunserh hmangin Pu K. Lalthangvunga, Secretary, SYMA chuan inhmelhriattirna hun a hmang a; Pu R. Lalruatkima, Vice President, SYMA in inlawmna hun a hmang a. Khuallianin thu a sawi bakah Khual Zahawm Pu R. Hmingthanzuala, Director, Art & Culture Dept.-in thu a sawi bawk a. Pu R. Lalengmawia, Chairman, Cultural Sub-Committee-in lawmthu sawina hun a hman bakah zaithiam tak tak ten xaiin kalkhawm te an awi reng a ni.

Cultural Meet-ah hian Sub Hqrs. YMA huam chhunga YMA Branch 18 te an tel a, a huhova Cheraw lam leh Khuallam entir a nih bakah YMA Branch tinin Mizo hnamlam pakhat theuh an entir. District Higher Secondary School, Keifang-ten Costume Parade an entir bawk a. Sub Hqrs. YMA Cultural Troupe bakah he cultural meet-a YMA Branch tel te chu hengte hi an ni - Ngopa, Ngopa chhim veng, Pawlrang, Hliappui, Saichal, Thanglailung, Buhban, N.Lungpher, Tualbung, Maite, Sihfa, Chawnpui Saitual, Venglai Saitual, Bazar Saitual, Venghlun Keifang, Leitan Keifang, Venglai Keifang  leh Rulchawm.