September 26th, 2017 khan Art & Culture Department hmalaknain Swachh Bharat Mission Campaign - Swachh Bharat Pakhwada (kar hnih awh tur faina beihpui thlakna) atana buatsaih Street Play chu Aizawl khawpui hmun hrang hrangah neih a ni a. He hun hi Ministry of Culture, Government of India hnuaia North East Zone Cultural Centre (NEZCC) bultum a ni.
Swachh Bharat Pakhwada hi chawhma dar 9 khan ITI Veng field-ah tan a ni a. Art & Culture Department Deputy Director, Pu Lalchuailova chu Khuallian niin Swachh Bharat Pakhwada programme hi a hawng a. Khuallian chuan kan k_i leh kawngpui balh chhan tam zawk chu keimahni mimal mawhphurhna a ni, a ti a. Bawlhhlawh thenfai ngawr ngawr hian faina tak tak a hring lova, bawlhhlawh hi paihna hmun dik taka paih a ni em tih hi kan ngaihtuah a tul a ni, a ti.
India ram pumah faina beihpui Swachh Bharat Mission chu uar taka kalpui mek niin Mission hnuaia programme lian ber chu Swachh Bharat Pakhwada a ni a. September Ni 16-30, 2017 chhung hian ram pumah kalpui a ni.
Mizoramah chuan September Ni 16,2017 hi sawrkar chawlh anih angin September Ni 15 khan school, sawrkar pisa-ah leh NGO thenkhat ten programme hi an hmang tan a. Swachh Bharat Pakhwada hi India ram puma ni inang tlanga hman tur niin Ni 26, 2017 hi ruat a ni. Art & Culture Department chuan programme hi kengkawhin CYMA leh NEIDA TATA Trust-in Lemchan Tawi – Skit intihsiakna a buatsaih a pakhatna dinhmun hauhtu ‘Zopar Drama Club’ Republic Vengthlang Branch YMA-te chuan Aizawl khawpui chhunga hmun thlan bik 10-ah faina kawnga inzirtirna lemchan ‘Thawk reng la, fai reng rawh’ tih chu an entir a ni.
