Art & Culture Department hnuaia Three Months Course - Traditional Dance & Modern Music chu kum 2023 atan hawn tan a ni leh ta a. Vawiin May 15, 2023 chawhma dar 10:30 khan Art & Culture Department Dance Hall-ah hawnna inkhawm neih a ni a, Pu Lalchuailova, Deputy Director, Art & Culture Department chuan inkhawm hi a kaihruai a, Pi Carol VLMS Dawngkimi, Director, Art & Culture Department chuan thusawiin, 'thangthar zawk ten mahni hnam zai leh lam hlutna chang hria a, thiam tura an rawn pen chhuak hi Art & Culture Department chuan lawmawm a ti tak zet a, kan culture leh tradition ti hlu tu leh vawnghim tu ni tlat turin zirlai ni thar te a fuih a ni. Art & Culture Department Director chuan zirlaite chu taima turin a fuih a, an zirlai mai bakah Kohhran leh khawtlang-a an mawhphurhna te tha taka hlen theuh turin a fuih bawk a, hun vawng dik tur te, rinawmna nunpui tlat turte in zirlaite a chah bawk a ni.

Inkhawm hruaitu Pu Lalchuailova, Deputy Director chuan, IMFA atang zir chhuak zingah ram pumhuapa mi lar leh hlawhtling an awm nual tawh a, chung mite thawhrimna hre reng chung leh entawn tlakte entawn chunga tih tak zeta an zirlaite zir turin zirlai te a fuih a. Pu Laltlanthanga Pachuau, Senior Instructor, IMFA chuan zirlai hnenah IMFA atanga Instructor leh Instructress-te hmel hriat tirna hun a hmang a; Pu Matlana chuan, 'hnam lam, zai leh music mai bakah kan Mizo zia, pipute nun dan leh culture te uar zawka an zir tel tur thu a sawi a', 'Mizo nun dik leh nun dan tha kan zir ang a, khawtlang tana pawha entawn tlak leh Mizo nun dan tha vawng him tu ni zel turin zirlaite kan zirtir dawn a ni', a ti bawk.