Vawiin Aug 12, 2024 chawhma dar 11:00 khan India ram zalenna champha lawmna pual a ‘Har Ghar Tiranga’ hnuaiah hnam puanzar nen a kawng zawhna hun, ‘Tiranga Yatra’ chu hlawhtling taka neih a ni a. Ministry of Culture, Government of India bul tuma neih "Tiranga Yatra" hi Aizawl-ah chuan Art & Culture Department-in a huaihawt a, Chanmari leh Sikulpuikawn inkarah India Flag nena kawngzawh niin zirlai naupang 800 chuangin India flag keng chungin kawng an zawh a, Vanapa Hall kawtah intawk khawmin Er. Lalhriatpuia, Deputy Commissioner hovin ‘Har Ghar Tiranga Pledge’ chham rualna hun neih a ni.

Er. Lalhriatpuia, Deputy Commissioner chuan, '‘Tiranga Yatra’, hnam puanzar nen a kawngzawhna chu India ram a chengte inlungrualna leh inpumkhatna ti nghet zual tur a buatsaih a nih thu leh mi tinin zalenna hlutzia an hriat thar nan leh chu zalenna humhim tur a ram leh hnam hmangaihna thinlung put a pawimawh thu a sawi'..

Aizawl a Tiranga Yatra buatsaih ah hian - Govt. Mamawii Higher Secondary School zirlai, Govt. JL Higher Secondary School zirlai leh Govt. Central Higher Secondary School zirlaite chu Sikulpuikawn atangin Pi Zonunthari, Joint Secretary, Art & Culture Dept. in a vai liam a. Govt. Chaltlang Higher Secondary School zirlai leh Govt. Mizo Higher Secondary School zirlaite chu Chanmari kawn atangin Pi Carol VLMS Dawngkimi, Director, Art & Culture in a vai liam thung a ni.

‘Har Ghar Tiranga’ pual a program hi August ni 15 thleng kalpui tur a ni a,  August 13, 2024 hian Vanapa Hall-ah a duh piang chhim theih turin ‘Tiranga Concert’ neih chhunzawm tur a ni a; hemi rual hian sawkar pisa pawimawh leh hmun pawimawhah te Tiranga Canvas, Har Ghar Tiranga / Jai HInd tih ziahna tur phochhuah a ni dawn a, a duh piang tana ziah theih Tiranga Canvas-ah hian lo ziak vek turin Art & Culture Department chuan mipuite a sawm a ni. 

August 13-15, 2024 chhungin In tinah India Flag tar chhuah tur a ni a, Art & Culture Department Office leh hmun hrang hrangah India Flag hi lei theihin a awm a. Chhung tin ten he hunbi tuk chhung hian India Flag lo zar theuh turin kan in sawmin kan in ngen a ni.