Vawiin khan ni hnih chhung awh Tribal Dance Festival chu Govt.' Primary School Field, Pawlrang, Saitual District-ah hlawhtling taka khar a ni. 

March 16 & 17, 2023 chunga neih Tribal Dance Festival hi  North East Zone Cultural Centre (NEZCC), Dimapur, Ministry of Culture, Govt.' of India leh Art & Culture Department, Mizoram buatsaih a ni a;  ni khatna March 16 -ah Pu Vanlaltanpuia, MCS, SDO(C) Ngopa chu khuallian a ni. Pu K. Lalthansanga, Secy., Mawmrang Group YMA chuan programme a kaihruai a, Pu F. Lalthanmawia, SRO, Art & Culture Department chuan report a pe in Pu PB Lalrinkima, Programme Coordinator, Art & Culture Department chuan lawmthu sawina hun a hmang bawk. Tribal Dance Festival ni khatnaah hian Ngo Branch YMA, Pawlrang Branch YMA, Ngopa Chhim Veng Br. YMA, Chhangzawl Branch YMA leh Hliappui Branch YMA-ten Mizo hnamlam an entir a ni. Khuallian Pu Vanlaltanpuia chuan thusawiin, "NEZCC leh Art & Culture Department-in culture humhim leh humhalh tura hetiang programme tha tak an buatsaih thin hi lawmawm a tih thu a sawi a; hnam-a min siamtu chu kan tawng te, kan hnam ziarang te hi a ni thin a, kan hnam lam, incheina-te thleng hian kan Mizo-na lantirtu a nih avangin chhawm nung zel turin Festival hmang tute a fuih a ni.

Tribal Dance Festival ni hnihna, March 17, 2023-ah hian Pu K. Lallawmsanga, President, Mawmrang Group YMA chu khuallian a ni. Pu Biakthansanga, VCP, Pawlrang chuan programme a kaihruai a, Pu F. Lalthanmawia SRO, Art & Culture Department chuan report pe -in, Pu PB Lalrinkima, Prog Coordinator chuan lawmthu sawina hun a hmang leh bawk. Khuallian Pu K. Lallawmsanga chuan thusawiin, 'hnam inpumkhatna hi nasa leh zual zawkin sawi uar zel ila, hnam inpumkhatna tha kan neih theihnan kan hnam nun leh ziarang thate vawng nun zel a pawimawh a ni' tin kalkhawmte a fuih  a ni. Ni hnihnaah hian Hliappui Cultural Club, Lengteng Cultural Club - Ngopa, Saichal Branch YMA, Mawmrang Cultural Club leh YMA Chhang Pawlrang-ten Mizo hnam lam chi hrtang hrang an entir a ni.