North East Zone Cultural Centre, Ministry of Culture, Gov’t of India leh Art & Culture Department, Mizoram tangkawpin an buatsaih UMANG Festival (Vohbikte Kut) chu vawiin March 13, 2023 khan Gilead Institute of Learning & Research, Brigade Rd., Bawngkawnah neih tan a ni a, naktuk March 14, 2023 hian khar a ni ang. Umang Festival hi NEZCC in India Hmarchhak State hrang hranga neih tura a ruahman a ni a, mi thiambik ten participants te thiam thil chi hrang hrang an zirtir thin a, Festival khar ni-ah an thil siam te an entir thin a ni. Tun tumah hian Basketry Making Workshop neiin bul an tan a, naktuk a kharna ni-ah hian an thilsiam te an entir dawn a, Umang Festival hi Mizorama tum 12 neihna a ni a.

12th Umang Festival hawnna inkhawm hi Pu F. Lalthanmawia,S.R.O, TRI, Programme Director ni bawk chuan a kaihruai a, Pu K. Lalruala, Deputy Director, Art & Culture Department, Nodal Officer, NEZCC chu khuallian niin, Pi H. Lalbiakdiki, Spl. Educator & Resource Person chuan thusawina hun a hmang bawk.

Khuallian Pu K. Lalruala chuan 'naupang enkawl ngai bikte enkawltu pawl leh mithiam tak tak enkawltu leh zirtirtu an awm chu vanneihthlak leh lawmawm a tih thu sawi a', Umang festival hi tun aia changtlung zawk leh nuam zawka hman chhoh zel a beisei thu sawiin chutiang tur chuan naupangte pawh an zirnaah theihtawp lo chhuah zel turin a fuih bawk a ni.

12th Umang Festival hawnna hunah hian Art & Culture Department atangin Pu PB Lalrinkima, Programme Coordinator, Pu Lalchungnunga leh Pu Lalchhandama leh Pu Zothanmawia IMFA-ten an telpui bawk a ni.