Vawiin khan Mizo Drama Society leh Mizo Department, Govt. Hrangbana College te ṭang kawpin an buatsaih World Theatre Day 2025 lawmna hun I&PR Auditorium-ah hman a ni a, Pi Carol VLMS Dawngkimi, Director, Art & Culture Department-in khual lian niin he hun hi a hmanpui.
Khual lian Pi Carol-i chuan, lemchan tih hmasawnna kawnga Mizo Drama Society-in nasa taka hma a lo la tawh chu thil lawmawm tak a ni a ti a. Tunlai Mizo khawtlang nunah film leh drama ngaih sânna a lian ta hle a, miin ei zawn nan an hmang tawh a; chuvangin, lemchan hi a zira zira hlawhtlinpui tak tak tura kan buaipui a ngai a ni a ti a. Chumi kawngah chuan Art & Culture Department hnuaiah Drama zirna thla thum course siam a ni a, zir tur an hmuh loh ṭhin thu sawiin he lama tuite tan zir theih reng a nih thu a sawi bawk. Kumin World Theatre Day thupui ‘Theatre and a Culture of Peace’ a nih angin remna leh muanna vawng nung zel turin kal khawmte a chah bawk.
He hunah hian kumin World Theatre Day puala Mizo Drama Society-in lemchan inziahsiak a buatsaih result puan niin lawm man sem nghal a ni a, a ti ṭha zual mi pathumte lemchan dah khawmna lehkhabu 'Chantual Piah Lam' tih chu khual lian Pi Carol-in a tlangzarh bawk. Lemchan inziahsiak lawm man latute hi – Pakhatna - Jonathan K. Laldinpuia, Thingsai, Pahnihna – Zothanmawia Electric Veng, Aizawl, Pathumna Lalremthanga, Suarhliap te an ni a. Anni bakah hian a ti \ha zual mi pathumte hnenah Consolation Prize pek an ni bawk.
He World Theatre Day lawmna hunah hian Pu H. Rotluanga chu khua zahawm niin lemchan tih hmasawn kawnga hma an lo lâk tawh dan leh an lo vahvaihpui nasat tawh dan a sawi a, amah kawmna hun hman nghal a ni bawk.
He hun hi Mizo Drama Society President Lalrinnghetan a kaihruai a, Laltlanmawia, Secretary-in report pein Hrangbana College-a 2nd Semester zir lai Remlalvuanin kal khawmte zaiin a awi bawk.
Mizo Drama Society hian lemchan tih hmasawn kawnga thawh hlawkte hnena kum hnih dana a pek ṭhin Mizo Drama Award chu Lalthangfala Sailo leh Prof. Laltluangliana Khiangte te hnenah a lo pe tawh a ni.
 |  |  |
 |  |  |
 |  |  |
 |  |  |
 |  |  |
 |
