Ni hnih chhung awh tur 'Zoawi Kut - 2023' chu vawiin chawhnu dar 2 khan Dawrpui Multipurpose Centre (DMC), Piputlang, Dawrpui-ah Art & Culture Minister, MZI Gen. Hqrs Patron ni bawk Pu R. Lalzirliana'n a hawng. Zoawi Kut hi North Eastern Council (NEC) bultum niin Art & Culture Department leh MZI Gen. Hqrs. tangkawpa buatsaih a ni a. Kut thupui hi "Unity through Music" (rimawi kaltlanga inpumkhatna) tih a ni.

North Eastern Council (NEC) Sponsor Zoawi Kut-ah hian Mizoram bakah North East state hrang hrang atangin cultural troupe te bakah zaithiam mimal leh band tha ber ber ten hun an hmang dawn a. A hawnna inkhawmah NE state hrang hranga remna leh muanna a awm zel duhna lantirna hun hman a ni bawk.

Khuallian Art & Culture Minister Pu Lalzirliana chuan culture chu hnam tin tana hnam phuarkhawmtu a nih thu a sawiin, zai leh lam chu Mizo hnam nuna bet tlat a nih thu sawiin, NE state hrang hrang ten mahni hnam lam leh zai te phochhuah theihna hun Zoawi Kut buatsaih a ni chu lawmawm a tih thu a sawi a. A vawikhat nana Zoawi kut buatsaih chuan rimawi leh lam hmanga India hmarchhak state a chengte a hnuhhnaih ngei a beisei thu a sawiin, India hmarchhak chu India state dangte lakah danglam bikna tam tak nei, hnam tlem zawk kan nih tlangpui avangin kan hnam ziarang hlu tak takte hi kan hloh mai loh nan kan chawilar a kan chhawm nun zel pawimawh a tih thu a sawi bawk a ni. 

Khualzahawm, Chief Secretary Dr Renu Sharma pawhin thusawiin North East-a hnam hrang hrang te hnam zia rang phochhuah theihna hun Zoawi Kut buatsaih a nih chu lawmawm a nih thu a sawi a, North East India-ah mai ni lo, India ram pumah rimawi hmanga inpumkhat leh zualna thleng zel se a duh thu a sawi bawk.

Zoawi Kut Organising Committee Chairman, Art & Culture Director ni bawk Pi Carol VLMS Dawngkimi pawhin thusawiin Zoawi Kut hlawhtlinna tura NE state hrang hrang leh Mizoram atanga kalkhawmte bakah kut chhimtute lawmna thu sawiin, he kut-in a tum ber chu rimawi leh hnam lam kaltlanga North East state hrang hranga cheng hnam hrang hrang te inuanauna tha leh zual a thlen a nih thu a sawi bawk a ni.

Zoawi Kut ni khatna ah hian Mizoram bakah Tripura, Meghalaya, Assam, Nagaland leh Arunachal Pradesh atangin zaithiam hrang hrang leh cultural troupe te telin zai leh lam ngaihthlak a thlir ho a ni a, Zoawi Kut ni hnihna hi July ni 28, 2023 chawhnu dar 2 atanga hman tan tur niin H&FW Vice Chairman Dr. Z.R. Thiamsanga chu khuallian a ni ang a, NEC Director (Tourism & Industries) Pi R. Lalrodingi chu khualzahawm a ni bawk ang. Zoawi Kut hi zan dar 9 thleng a duh apiang tan chhim theih a ni a, ei leh in lam leh thil dang chi hrang hrang zawrhna te hawn a ni a, naktukah pawh zan dar 9 thleng bawkin a duh apiang tan chhim theih a ni dawn a ni.