March 1 - 3, 2023 (ni thum chhung) chhung khan Chapchar Kut 2023 pualin Zokhua, Falkawnah Zonun Kutpui - Hmanlaia Mizotem nundan tlangpui entirna buatsaih a ni a, mipuiin an hlut hle. Zonun Kutpui hawnna hi March 1, 2023 chawhma dar 11:00 khan neih a niin Pu R. Lalzirliana, Hon’ble Minister, Art & Culture Department chuan a hawng a ni. Zonun Kutpui hawnna inkhawm hi Pi Carol VLMS Dawngkimi, Director, Art & Culture Department-in a kaihruai a, Pi P.C. Zosangpuii, Museum Curator chuan report pe in, Zonun Kutpui hawngtu Khuallian Pu R. Lalzirliana chuan thusawiin, “Kan sawrkar hian Art & Culture Department hmangin Zofate inpumkhat zual zelna tur atan te, kan culture & tradition humhalh leh chawi nung zel kawngah te theihtawp chhuahin hma kan la zel a. Vawiin-ah pawh hian kan pipute Kut ropui ber Chapchar Kut pualin hmanlaia kan pipute nundante entirna Zonun Kutpui kan lo hmang tan dawn ta a,  Kumin atang hian huam zau leh darh zau zawnga Kut kan han theihnan ngaihtuahna ka han seng tan ta a,  kum lo vei zelah  heng aia huam zau zelin khaw tin, veng tinah te leh hmun hrang hrangah a bika entir tur leh lawmna te kan buatsaih thei zel turah kan ngai a ni”, a ti. 

Zonun Kutpui hman chung hian nitin ‘Hmanlaia Mizote nundan’ entir a ni thin a ni a, mizo la deh dan kimchang, belvuak leh thangkamte entir a ni bawk. Zonun Kutpui buatsaihnaah hian Art & Culture Department leh Joint NGO, Falkawn te thawkhovin mi 122 thlan chhuah te bakah hmun hrang hrang atanga Mizo la deh thiam leh bel vuak thiam ten hmanlaia kan pipute n undan an entir thin a ni.